Хотира ва қадрлаш кунига бағишлаб

2011-05-09

9-12 май кунлари Фонд Форум, “Меҳр нури” ҳайрия жамғармаси, “Аёллар кенгаши” РЖБ Хотира ва қадрлаш кунига бағишланган анъанавий акция ўтказишди. Бу йил унинг доирасида мамлакатимиз бўйлаб 1000 дан ортиқ уруш қатнашчилари ҳолидан хабар олиниши режалаштирилган. Пойтахтимизда истиқомат қилаётган 200 нафар уруш фахрийларига махсус совғалар топширилди.

Хотира ва қадрлаш кунига бағишлаб акция ўтказиш жамғармаларнинг ўзига хос анъаналаридан бирига айланиб улгурди. Фонд Форум, “Аёллар кенгаши” ҳамда “Меҳр нури” жамғармаси ҳар йил мамлакатимиз озодлиги, тинчлигимиз учун курашган инсонларни байрам билан қутлайди. Улар орасида бевосита урушда иштирок этгандар ҳамда меҳнат фронти қатнашчилари бор.

Жамғармалар вакиллари пойтахтимизнинг барча туманларини бирма-бир айланиб, юзлаб фахрийларни табриклашади. Акциядан кўзланган мақсад уларга ҳурмат, ғамхўрлик ва эътибор кўрсатишдир.

Ҳафиза Абдуллаева, 1922 йилда туғилган, Тошкент шаҳри:

- Деярли 90 ни қоралаб қўйган бўлсам-да, бугун 50 ёшга яшаргандек ҳис қилдим ўзимни. Гап совғада эмас, эътиборда. Бугун мени қутлаш учун келганларга катта рахмат. Жамғармалар томонидан амалга оширилаётган ҳайрия ишларининг барчаси юксак эътирофга лойиқ. Юртимиз доим тинч бўлсин. Эътибор ва ғамхўрлик учун миннатдорман.

Зоя Волкова, 1923 йилда туғилган, Тошкент шаҳри:

- Мен Волгоградда туғилганман. Турмуш ўртоғим эса тошкентлик. Биз уриш пайтида танишиб қолганмиз, кейин тўй қилиб, бу ерга кўчиб келдик. Шу инсон билан тақдиримни боғлаганим, ушбу жаннатмакон ўлкада яшаётганимдан ниҳоятда баҳтиёрман. Инсонлар бир-бирига ғамхўр бўлиб, тарихни ва оғир кунларни унутмасликларини истардим.

Ражаб Ғофуров, 1925 йилда туғилган, Самарқанд шаҳри:

- Ушбу байрамда уйимга ташриф буюрганингиздан бошим осмонга етди. Заминимизга ҳеч қачон уруш ораламасин. Бугунги осойишта, тинч ҳаётимизга кўз тегмасин.

Хотира ва қадрлаш куни мамлакатимиздаги энг муҳим байрамлардан биридир. Хотира, меҳр-оқибат, қадр-қиммат, рамзи бўлган ушбу қутлуғ кунда ёшликнинг навқирон чоғларини уруш оловларида, жангоҳларда ўтказиб, бугунги тинч ва осойишта ҳаётимиз учун курашган инсонлар жасоратини ёдга оламиз. Инсоният тарихида узоқ давом этган мудҳиш урушнинг оғир жароҳатлари жабрланган халқлар қалбида ва хотирасида абадий яшайди. Эл-юрт тинчлиги, осойишталиги йўлида жон фидо қилган юртдошларимиз руҳини шод этиш, шиддатли жанг майдонларида жасорат кўрсатган ҳамюртларимизга ҳурмат-иззат кўрсатиш бизнинг бурчимиздир.